„Það hafa verið heilmiklar framkvæmdir í dag inni í botni Ingólfsfjarðar og þeim verður fram haldið á morgun ef það kemur ekki úrskurður frá Vegagerðinni,“ segir Guðmundur Hrafn Arngrímsson, talsmaður hluta landeigenda á Seljanesi í Árneshreppi, hvar fyrirhuguð er Hvalárvirkjun sem fyrirtækið Vesturverk stendur að.
Unnið er að lagfæringum á vegum í firðinum. Andstæðingar virkjanaframkvæmda vilja láta reyna á lögmæti ákvörðunar Vegagerðarinnar um að afsala sér framkvæmdarétti á veginum og breyta honum um leið úr landsvegi í virkjunarveg.
„Það er verið að vinna fyrir okkur lögfræðiálit og við bíðum eftir svörum frá Vegagerðinni. Þeir staðfestu móttöku erindis okkar í gær,“ segir Guðmundur Hrafn, en hann undrast leyfisveitingar í tengslum við málið.
„Forundran mín eykst með degi hverjum á því hve mikil brotalöm er í allri þessari málsmeðferð og að verkið sé komið svona langt. Það stendur ekki steinn yfir steini,“ segir hann í umfjöllun um mál þetta í Morgunblaðinu í dag.
Heimild: Mbl.is
