Fulltrúar nokkurra íbúðasamvinnufélaga og stéttarfélaga fóru nýlega til Svíþjóðar til að kynna sér starfsemi íbúðafélaga, löggjöf og fleira. Fulltrúi Búfesti segir sláandi hve löggjöfin og húsnæðismarkurinn sænski sé langt á undan því sem hér gerist.
Sænsk löggjöf mun hagstæðari fyrir leigjendur
Þá séu óhagnaðardrifin félög mjög áberandi í Svíþjóð og reglur leigjendum hagstæðar. „Til dæmis bara löggjöf í Svíþjóð, ef þú átt orðið örlítið meira en kannski fjórar íbúðir þá þarftu að skrásetja það og þú ræður ekki lengur hámarks leigu. Slík löggjöf myndi auðvitað hjálpa leigjendum hér alveg gífurlega mikið.
“ Og í þessu samhengi vill hann sjá íslensk íbúðafélög, sem ekki eru drifin áfram af hagnaði, sameina krafta sína til að ná fram umbótum í húsnæðismálum.
Segir norðlensk sveitarfélög viljug til samstarfs
Á næstu fjórum árum er áformað að á vegum Búfesti verði reistar að lágmarki 150 íbúðir í samvinnu við sveitarfélög á Norðurlandi. Félagið hefur þegar gert samkomulag við Akureyrarbæ og Norðurþing um að útvega lóðir fyrir leigu- og búseturéttaríbúðir og á í viðræðum við fleiri sveitarfélög. „Það er kominn gífurlegur vilji sveitarfélaga hérna á þessum landshluta til að fara að skoða þetta endanlega,“ segir Eiríkur.
Hægt að túlka íslenskar reglur á mismunandi hátt
Og á vegum Búfesti sé áformað að hefja innflutning á sænskum einingarhúsum í þessum tilgangi næsta sumar. Þar geti gengisþróun þó sett strik í reikninginn og þá þurfi að leysa ýmsar tæknilegar hindranir. „Það er skrýtið að fyrirtæki í Svíþjóð, sem vilja selja til Íslands, geti ekki bara sent teikningar sínar af tilbúnum húsum og fengið kannski bara svar hjá Mannvirkjastofnun: „Já, þetta hús mun fá byggingaleyfi á Islandi.”
Vegna þess að reglur á Íslandi geta verið það sérstakar að það getur verið mismunandi túlkun byggingafulltrúa í þessu sveitarfélagi eða öðru sveitarfélagi,“ segir hann.
Heimild: Ruv.is
