Borgarráð hefur samþykkt að veita Búseta 50 milljón króna afslátt af kaupverði lóðarinnar Keilugranda 1 í Vesturbænum. Borgin úthlutaði Búseta lóðinni í mars 2017 og var heildarupphæð byggingarréttar og gatnagerðargjalda rúmar 400 milljónir króna. Búseti hyggst reisa fjögur hús á lóðinni sem verða tveggja til fimm hæða með 78 íbúðum.
Íbúðirnar verða af fjölbreyttum stærðum og gerðum, allt frá 40 fermetra smáíbúðum upp í 125 fermetra 4 til 5 herbergja íbúðir.
Ástæðan fyrir afslættinum er sú að þegar SÍF-skemman, sem áður stóð á lóðinni, var rifin kom í ljós leyndur galli. Púði sem var undir húsinu og byggja átti ofan á reyndist ónothæfur. Jarðvegur reyndist mengaður enda gamlir sorphaugar á þessu svæði.
Í stað þess að fjarlægja jarðveginn var sú ákvörðun tekin að byggingar yrðu grundaðar á forsteyptum súlum, eins og fram kom í frétt í Morgunblaðinu í vikunni. Var þetta gert til að lágmarka áhættu og kostnað af því að fjarlægja jarðveginn. Greiðir Reykjavíkurborg helming af umræddum grundunarkostnaði. Langt er niður á fast berg á þessu svæði, eða átta metrar að meðaltali.
Jafnframt samdi Reykjavíkurborg við Búseta um frágang á lóðinni og að búa hana leiktækjum, en hluti hennar telst borgarland. Þarna á að vera lýðheilsureitur, alls 860 fermetrar. Búseti tekur að sér að annast rekstur og viðhald svæðisins næstu 25 árin. Fær Búseti greiddar tæpar 40 milljónir fyrir frágang og rekstur borgarlandsins.
Heimild: Mbl.is
