Stapi Lífeyrissjóður á Akureyri keypti 35 íbúða blokk á einu bretti í ágústmánuði. Fasteignamat íbúðanna er samanlagt 900 milljónir króna. Frá þeim tíma hefur nýbyggingin staðið auð og enginn flutt inn í blokkina.
Blokkin sem um ræðir er staðsett í Undirhlíð 1 á Akureyri. Í blokkinni eru 35 íbúðir sem eru frá 60 til 130 fermetrar að stærð. Jóhann Steinar Jóhannsson, framkvæmdastjóri Stapa, vill ekki gefa upp kaupverð íbúðanna.
„Samningar voru undirritaðir við byggingaraðilann á vordögum og það er rétt að íbúðirnar voru tilbúnar í ágúst. Það sem gerist svo í kjölfarið er að framkvæmdastjóri og sjóðsstjóri lífeyrissjóðsins hætta störfum og því er lagt nýtt mat á verkefnið sem slíkt,“ segir Jóhann Steinar.
Íbúðirnar voru keyptar með það að markmiði að leigja þær á frjálsum markaði. Til er lagaheimild fyrir lífeyrissjóði til tað fjárfesta í íbúðarhúsnæði og taldi lífeyrissjóðurinn þetta ákjósanlegan fjárfestingarkost síðastliðið vor. Ljóst er að stjórn og framkvæmdastjóri eru ekki á þeirri skoðun eins og staðan er núna.
„Við erum með blokkina í söluferli og mun það klárast á næstu vikum. Við erum í samningaviðræðum við aðila sem vilja kaupa eignina,“ bætir Jóhann Steinar við.
Stapi vill selja blokkina í heilu lagi og því eru ekki margir aðilar á markaði sem hafa burði í svoleiðis fjárfestingar. Leiða má að því líkur að félög á borð við Heimavelli og Almenna leigufélagið séu á bak við það að kaupa húsnæðið.
„Við vonumst eftir því að koma ekki út úr þessu með tapi fyrir sjóðinn. Hins vegar er ljóst að á meðan enginn er í íbúðunum þá eru ekki tekjur að koma inn og á móti þurfum við að greiða rafmagn og hita, fasteignagjöld og annan kostnað sem hlýst af því að eiga fasteignir,“ segir Jóhann Steinar.
Hann áréttar að engin tengsl séu á milli fjárfestingarinnar og þeirrar staðreyndar að bæði sjóðsstjóri og framkvæmdastjóri hættu störfum fyrir Stapa á svipuðum tíma og salan gekk í gegn.
Heimild: Visir.is
