Bygging sem nú rís við Hlaðgerðarkot í Mosfellsdal mun leysa gríðarlegan vanda fyrir meðferðarstöð sem þar er rekin. Þetta segir framkvæmdastjóri Samhjálpar en byggingin er reist fyrir ágóða landssöfnunar á Stöð 2 árið 2015. Flestir vistmanna Hlaðgerðarkots eru í yngri kantinum, en 70% þeirra eru undir 40 ára aldri.
Tæplega 85 milljónir söfnuðust á landssöfnunarkvöldinu fyrir tæplega tveimur árum síðan og var fénu varið til að reisa nýja byggingu. Í dag var fokheldi fagnað af forsvarsmönnum Samhjálpar og öðrum velunnurum, en u.þ.b. ár er síðan fyrsta skóflustunga var tekin að húsinu.
Húsið er tengt við eldra húsnæði á svæðinu og er útsýni yfir Mosfellsdalinn nýtt til hins ýtrasta, vistmönnum og starfsfólki til yndisauka. Þar verður m.a. starfrækt mötuneyti meðferðarstöðvarinnar auk skrifstofa hjúkrunarfræðings og læknis.
Um 300 manns sóttu sér meðferð vegna áfengis- og fíkniefnavanda í Hlaðgerðarkoti árið 2016. Þar af er langstærstur hópur á aldrinum 20-29 ára, en færst hefur í aukana að fólk á þeim aldri sæki sér meðferð og er það oftast háð sterkari efnum en áfengi einu.
Þrátt fyrir þann fjölda sem hlaut meðferð á síðasta ári þurftu um 600 frá að hverfa, þar sem ekki voru nógu mörg pláss í boði. Vörður segir afar leiðinlegt að starfsfólk geti ekki sinnt öllum sem á náðir þeirra leita.
Meðferð á stofnuninni nær nú yfir þriggja mánaða skeið, í stað sex vikna líkt og áður var. Þetta segir Vörður að hafi gefið góða raun, en aftur á móti séu plássin þannig notuð í lengri tíma í senn.
Rýmum er þó ekki fjölgað með nýbyggingunni, heldur var nauðsynlegt að taka eina aðalbyggingu meðferðarstöðvarinnar úr notkun – þar sem hún telst ónýt. Herbergi starfsmanna verða því færð í bygginguna sem áður hýsti matsal og verða þau jafn mörg og áður. Næsta skref er hins vegar að rífa ónýtu bygginguna og safna fyrir nýrri, þannig að unnt verði að fjölga plássum til muna.
Heimild: Visir.is
