Doktor Þórður Víkingur Friðgeirsson er verkfræðingur og hefur rannsakað stjórnsýslu hins opinberra við stórar framkvæmdir. Hann hefur sýnt fram á að kostnaður við opinberar framkvæmdir fer að meðaltali um sextíu prósent fram úr áætlunum hér á landi. Hann mátaði undirbúning Vaðlaheiðarganga við norska verkferla og segir að 40 prósent rannsókna og athugana hafi vantað.
„Norðmenn hafa dregið upp ítarlegar kröfur sem við getum kallað lágmarksviðmið um það hvernig er staðið að undirbúningi, mati á áhættu, þjóðhagslegri hagkvæmni, kostnaði og heilt yfir það sem við köllum hagkvæmniathugun. Og slíkar kröfur eru ekki í þeim mæli og alls ekki jafnítarlega hér á landi eins og þar,“ segir Þórður Víkingur.
Lögin um svona framkvæmdir eru þó svipuð í Noregi og hér á landi. „En það eru hinsvegar þessi tæknilegu viðmið sem eru gefin út af fjármálaráðuneytum þessara landa sem eru miklu ítarlegri í Noregi en á Íslandi.“
Þórður minnir á að formaður samgöngunefndar Alþingis hafi varað við gerð ganganna á grundvelli skýrslu þar sem kostnaður var talinn stórlega vanáætlaður. Meirihluti fjárlaganefndar hafi hinsvegar stutt hana eins og þáverandi fjármálaráðherra, fyrsti þingmaður kjördæmisins. Þórður Víkingur segir að hér á landi búi stjórnmálamenn við mikinn freistnivanda. „Freistnivandi getur birst í þeirri mynd að ef umhverfið er óljóst, leikreglurnar óskýrar þá getur það gerst að þingmönnum veitist það léttara að koma gæluverkefnum sínum á framfæri vegna þess að það er ekkert viðnám er í stjórnsýslunni sjálfri. Og var það þannig í þessu tilviki? Ég ætla ekkert um það að segja en það verður hver að dæma um það fyrir sig.“
Heimild: Rúv.is
