Skrifstofa borgarstjóra og borgarritara hefur sent frá sér athugasemdir vegna þess sem borgaryfirvöld kalla „alvarlegar staðreyndavillur“ í umfjöllun Kastljóss um uppbyggingarreiti og samninga við olíufélög. Villurnar snúi meðal annars að meintri leynd og verðmati á byggingarrétti.
Í gær fór innslag fréttakonunnar Maríu Sigrúnar Hilmarsdóttur um samninga sem Reykjavíkurborg gerði við olíufélögin árið 2021 í loftið. Innslagið átti upphaflega að birtast í fréttaskýringarþættinum Kveik en fór ekki í loftið þar og í kjölfar þess var Maríu Sigrúnu vikið úr ritstjórnarteymi þáttarins.
Fyrrverandi fulltrúar ósáttir
Innslagið var sýnt í Kastljósi í gærkvöldi. Kom þar meðal annars fram að þáverandi oddviti Sjálfstæðismanna, Eyþór Arnalds, hafi fundist afgreiðslu málsins óeðlilega og að þarna hafi stórt mál verið afgreitt fyrir luktum dyrum. Vinnubrögð borgarstjórnar voru gagnrýnd verulega.
Þá sagði Vigdís Hauksdóttir sem þá var borgarfulltrúi Miðflokksinsing að það hafi verið ótrúlegt að málið hafi náð í gegn en hún gerði miklar athugasemdir við viðskiptin á sínum tíma. Olíufélögin hafi fengið allt sem þau vildu.
Verðmat byggingarréttar ofmetið
Í tilkynningu frá Reykjavíkurborg segir að í innslaginu hafi verið alvarlegar staðreyndavillur um samningana, þar á meðal um fjölda íbúða sem reisa átti í fyrsta áfanga samninganna. Í innslaginu kom fram að þær væru sjö hundruð talsins. Þvert á móti væri fjöldinn nær 450. Þá hafi verðmæti byggingaréttar verið ofmetið.
„Þar er aftur verið að gefa sér mun meira byggingarmagn heldur en líklegt er að verði samþykkt í deiliskipulagsferli sem er grundvöllur þess að endanlegir samningar verði gerðir. Reykjavíkurborg mótmælti þessum útreikningi um að verðmæti byggingaréttar á þessum lóðum séu um 10 milljarðar en ekki var tekið tillit til þess í umfjöllun Kastljóss.
Einnig er ekki tekið tillit til kostnaðar olíufélaganna við uppbygginguna svo sem hreinsun jarðvegs og að fjarlægja byggingar sem fyrir eru á lóðunum og þá er ekki heldur tekið tillit til þess að á lóðunum er fyrir ábatasamur rekstur fyrir olíufélögin sem verða af tekjum vegna breytinganna,“ segir í tilkynningunni.
Samkvæmt upplýsingum frá Klasa sé verðmat á virði byggingarréttar á lóðum sem áður voru bensínstöðvar undir þriðjungi af þeirri upphæð sem nefnd var sem dæmi í Kastljósi.
„Þannig er byggingarréttur fyrir stóra lóð í Norður-Mjódd, sjávarlóð við Klettagarða, lóð við Nýbýlaveg í Kópavogi og önnur við Tjarnarvelli í Hafnarfirði stærsti hluti þeirra 3,9 milljarða sem nefndir eru í þættinum sem dæmi um gróða olíufélaga af þessum viðskiptum. Þetta eru ekki bensínstöðvalóðir. Hagar meta verðmæti byggingarréttar vegna þriggja bensínstöðvalóða ásamt inneign gatnagerðargjalda og önnur réttindi á um 1,2 milljarð króna en ekki 3,9 milljarða eins og haldið var fram í Kastljósi,“ segir í tilkynningunni.
Engin leynd
Í þættinum hafi ítrekað verið gefið til kynna að leynd hvíldi yfir gögnum í þessu máli eða að gögn hafi verið sett fram á sumarleyfistíma.
„Rétt er að ítreka að í fundargerðum borgarráðs er að finna ítarleg gögn, skýrslur og stefnur þar sem fjallað er um aðdraganda málsins auk þess sem birtar eru áfangaskýrslur og allir samningar.
Þá var farið yfir stöðuna á þeirri vinnu að stuðla að fækkun bensínstöðva í borginni og allri samningagerð í borgarráði 17. nóvember 2022 og var kynningin birt í opinberum fundargerðum á vef Reykjavíkurborgar,“ segir í tilkynningunni.
Heimild: Visir.is
