Framkvæmdir vegna stækkunar hjúkrunarheimilis Hrafnistu í Reykjanesbæ eru hafnar. Jarðvinna stendur nú yfir og vinnur Ellert Skúlason ehf. að verkefninu. Skóflustunga var tekin í maí í fyrra og skrifað undir samning um uppbygginguna, sem þá átti að vera 60 rýma hjúkrunarheimili.
Í desember náðust svo samningar milli heilbrigðisráðuneytisins og Reykjanesbæjar um viðauka við samninginn sem fjölgaði hjúkrunarrýmum úr 60 í 80. Þar með hækkar nýbyggingin úr þremur hæðum í fjórar. Kostnaður við framkvæmdina skiptist þannig að ríkið greiðir 85% og Reykjanesbær 15%.
Nýtt hjúkrunarheimili við Nesvelli leysir Hlévang, eldra heimili í Keflavík, af hólmi. Þá tryggir staðsetning á Nesvöllum góða samnýtingu og hagræðingu. Hjúkrunarheimilið á Nesvöllum opnaði 14. mars 2014 og leysti þá af hólmi Garðvang í Garði.
Heimild: VF.is
