Danski lyfjarisinn Novo Nordisk hefur ákveðið að byggja fremur vöruhús á lóðinni. Áformuðum störfum á svæðinu fækkar um meira en 300.
Danski lyfjarisinn Novo Nordisk hefur fallið frá áformum um að reisa stóra verksmiðju í Óðinsvé þar sem til stóð að um 400 manns myndu starfa. Forstöðumaður hjá Novo í Óðinsvé staðfesti þetta við TV2 Fyn.
Þess í stað hyggst lyfjafyrirtækið nota bygginguna, sem er þegar í smíðum og áætlað er að verði tilbúin á næsta ári, sem vöruhús. Nú er útlit fyrir að færri en 75 manns muni starfa í starfsstöðinni.
Í svari við fyrirspurn viðskiptamiðilsins Børsen segir félagið að ákvörðunin endurspegli skynsamlega ráðstöfun þegar kemur að húsnæðismálum félagins út frá núverandi markaðsaðstæðum og breyttri eftirspurn á heimsvísu.
„Því miður mun þetta leiða til fækkunar starfsfólks og hafa áhrif á meira en helming þeirra 150 starfsmanna sem starfa á svæðinu, auk þess sem áður fyrirhuguð störf verða ekki að veruleika að svo stöddu.“
Þegar framkvæmdir voru að hefjast í desember 2024 efndi Novo til stórrar athafnar þar sem þáverandi forstjóri félagsins, Lars Fruergaard Jørgensen, þáverandi fjármálaráðherra Nicolai Wammen og borgarstjóri Óðinsvéa, Peter Rahbæk Juel, kynntu áformin.
