EFLA hagnast um 1,1 milljarð
Tekjur samstæðunnar jukust um 6,9% milli ára og námu 13,1 milljarði króna.
Efla verkfræðistofa hagnaðist um 1.093 milljónir króna á árinu 2025, samanborið við 1.137 milljóna króna hagnað árið áður. Stjórn félagsins lagði til arðgreiðslu að fjárhæð 1,2 milljarðar króna, samkvæmt ársreikningi fyrirtækisins.
Hagnaður ársins var í samræmi við áætlanir, að því er segir í fréttatilkynningu.
Tekjur samstæðunnar jukust um 6,9% milli ára og námu 13,1 milljarði króna. Rekstrarkostnaður lækkaði lítillega milli ára og var EBITDA félagsins 10%.
„Rekstur félagsins gekk vel á síðasta ári og var á pari við metnaðarfullar áætlanir. Talsverður tekjuvöxtur og góð afkoma var af rekstri erlendra dótturfélaga EFLU og var umfang þeirra um fjórðungur af starfsemi félagsins,“ segir Kristín Friðgeirsdóttir, framkvæmdastjóri EFLU.
„Þrátt fyrir talsverða óvissu og neikvæðar fréttir úr efnahagsumhverfinu, skilum við góðri afkomu og styrkjum grunnstoðir EFLU til enn frekari sóknar.“
Kristín, sem var ráðin framkvæmdastjóri Eflu í september 2025, er í ítarlegu viðtali í Viðskiptablað vikunnar og ræðir þar um vöxt verkfræðistofunnar á síðustu árum.
Heildareignir EFLU í árslok 2025 námu 5,4 milljörðum króna og var eiginfjárhlutfall 54,5%. Þá fjölgaði starfsmönnum á árinu og voru þeir 548 í 518 stöðugildum í árslok. EFLA er í eigu 199 starfsmanna félagsins.
Heimild: Vb.is
