Gamla Íslandsbankahúsið við Lækjargötu stendur nú autt, afgirt með útkrotaða glugga. Efri gluggar eru sumir brotnir eða búið að birgja fyrir þá. Dúfur hafa gert sig heimakomnar.
Þegar vinningstillaga Glámu-Kím úr samkeppni vegna nýs hótels var kynnt, voru viðbrögðin misjöfn. Tillagan fór til umfjöllunar í umhverfis- og skipulagsráði Reykjavíkurborgar auk þess sem sérstakur faghópur átti að starfa með byggingafulltrúa til að meta útlit byggingarinnar, líkt og annarra í borginni.
Davíð Torfi Ólafsson, framkvæmdastjóri Íslandshótela, vonaðist á sínum tíma til að skipulagið yrði samþykkt um haustið. Nú, einu og hálfu ári síðar, er hótelbyggingin hins vegar enn í skipulagsferli.
Davíð Torfi segir nú sé gert ráð fyrir að opna hótelið árið 2019 eða 2020. Það verði 140 herbergja og fjögurra stjörnu. Stefnt sé að því að hefja framkvæmdir síðar á þessu ári. Davíð Torfi segir að enn sé verið að vinna að hönnun á útliti hússins. Húsið við Skólabrú 2 verði fellt inn í hótelið.
Vorið 2015 fundust rústir húss frá fyrstu öldum Íslandsbyggðar, í grunni við hliðina á gamla Íslandsbankahúsinu. Vitað var um landnámsbyggðir þar sem nú er Suðurgata og Aðalstræti en ekki var vitað til þess að byggð næði svona langt í austur
Davíð Torfi hefur lýst yfir vilja til að fella fornleifarnar inn í hótelið.
Davíð Torfi segir að einhvers konar sýning verði í kjallaranum, þó ekki endilega eins og í Aðalstræti 16, þar sem sýningin Reykjavík 871+/-2 Landnámssýningin var opnuð vorið 2006. Davíð Torfi segir að ekki sé búið að fullhanna sýninguna en gert sé ráð fyrir að hún verði opin almenningi.
Heimild: Ruv.is
