Suðurtak ehf í Grímsnesi bauð lægst í endurbætur á Biskupstungnabraut frá Geysi að Tungufljóti. Um er að ræða 1,6 km kafla.
Suðurtak bauð rúmar 58,7 milljónir króna sem er 93,2% af áætluðum verktakakostnaði. Sú tala var 63 milljónir króna.
Tvö hærri tilboð bárust. Þjótandi ehf á Hellu bauð tæpar 66,3 milljónir króna og Borgarverk ehf í Borgarnesi bauð rúmar 92,6 milljónir króna.
Í vetur verður unnið að efnisútvegun og breikkun vegarins. Þeirri vinnu skal lokið fyrir 1. mars næstkomandi. Eftir 1. maí verður núverandi slitlag fræst upp, vegurinn styrktur og klæddur á nýjan leik.
Heimild: Sunnlenska.is
