Fjölmörg snjóflóð féllu í grennd við byggð í tveimur hrinum á norðanverðum Tröllaskaga og Vestfjörðum í mars. Ofanflóðasérfræðingur segir að grípa hefði þurft til rýmingar á Patreksfirði og Siglufirði ef ofanflóðavarnir hefðu ekki verið til staðar.
Grípa hefði þurft til rýmingar vegna snjóflóða á Patreksfirði og Siglufirði ef ofanflóðavarnir hefðu ekki verið til staðar, segir ofanflóðasérfræðingur. Fjölmörg snjóflóð féllu í grennd við byggð í tveimur hrinum á norðanverðum Tröllaskaga og Vestfjörðum í mars.
„Það mæddi mikið á varnarvirkjum,“ segir Óliver Hilmarsson, ofanflóðasérfræðingur hjá Veðurstofu Íslands.
Snjóflóðavarnargarður ofan Patreksfjarðar kom í veg fyrir að snjóflóð félli á hús neðan garðsins. Snjóflóðið féll 26. mars og er það stærsta sem fallið hefur á þessum slóðum allt frá 1958.
„Þar er nýbúið að reisa varnarvirki fyrir ofan Urðir. Þetta er einn virkasti snjóflóðafarvegur á landinu. Þetta er með breiðustu flóðum sem hafa fallið þarna í mörg ár. Það skall með nokkrum krafti á þeim varnargarði,“ segir Óliver.
„Það er alveg klárt að það hefði verið gripið til rýmingar.“
Að öllum líkindum hefði þurft að grípa til rýmingar vegna snjóflóðs úr Selskál ef stoðvirki hefðu ekki verið til staðar. Hrinan er líklega sú mesta frá því að uppbygging varnarvirkja hófst á Siglufirði eftir mannskæð snjóflóð í Súðavík og á Flateyri árið 1995.
„Það er ekki hægt að segja með fullri vissu hversu stór þessi flóð hefðu verið. En það hefði alveg klárlega þurft að grípa til viðamikillar rýmingar í gegnum þetta veður ef þetta hefði ekki verið,“ segir Óliver.
„Það er talsvert eftir en það er kominn aukinn kraftur í þetta núna. Það er mjög gott, eins og á Patreksfirði, að varnir séu komnar áður en flóðið fellur en ekki rétt á undan eins og gerðist í Neskaupstað 2023, þar eru varnir langt komnar núna.“
Heimild: Ruv.is
