Lögreglan vinnur enn að rannsókn vinnuslyss á Hvolsvelli um helgina þar sem karlmaður á sjötugsaldri lést.
Lögregla, slökkviliðsmenn og sjúkraflutningamenn fóru á vettvang og var maðurinn úrskurðaður látinn á vettvangi en slysið átti sér stað á byggingarsvæði á Hvolsvelli.
„Það er verið að afla allra upplýsinga um hvað gerðist en um vinnuslys var að ræða. Rannsóknardeildin er með þetta mál í sínum höndum ásamt Vinnueftirlitinu,“ segir Þorsteinn M. Kristinsson, aðalvarðstjóri hjá lögreglunni á Suðurlandi, í samtali við mbl.is.
Ekki er unnt að birta nafn hins látna að svo stöddu.
