Uppsteypu á Norðurljósarannsóknarhúsi Aurora Observatory á Kárhóli í Reykjadal lauk í síðustu viku og við tekur uppsetning á stálvirki efstu hæðar hússins, auk frágangs drenlagna við húsið. Áætlað er að bygging efstu hæðar hússins hefjist fljótlega.
Verktakafyrirtækið SS Byggir vinnur að uppsteypu á húsinu.
Húsið er um 760 m² að stærð og er staðsett skammt norðan og ofan við bæjarhúsin á Kárhóli. Byggingin er 3 hæðir, byggð úr steinsteypu og stáli. Að sögn Reinhards Reynissonar hjá Atvinnuþróunarfélagi Þingeyinga er bygging hússins nokkuð á eftir áætlun en þrátt fyrir það er stefnt að því að koma fyrir einhverjum rannsóknartækjum um leið og kostur er svo að rannsóknarstarfsemi geti hafist í húsinu sem fyrst og það helst fyrir veturinn.
Á efstu hæð hússins verður öflugum myndavélum komið fyrir og þeim beint til himins til að fylgjast með norðurljósunum auk ýmiskonar rannsóknartækja. Á miðhæðinni verða ma. skrifstofur, rannsóknarstofur og fundarsalur og á jarðhæðinni verður sýningarsalur og fyrirlestrarsalur.
Heimild: 641.is
