Ákveðið hefur verið að ráðast í lagfæringar á Flóttamannaleið, sem gengið hefur undir ýmsum nöfnum, svo sem Elliðavatnsvegur, Flóttamannavegur og Ofanbyggðavegur.
Hann liggur í gegnum þrjú sveitarfélög, Hafnarfjörð, Garðabæ og Kópavog. Ástand vegarins er á löngum köflum slæmt og umbætur óhjákvæmilegar.
Veginn lagði bandaríska varnarliðið á árum seinni heimsstyrjaldarinnar, 1942. Vegurinn er því barn síns tíma og er bugðóttur og hæðóttur.
Mikil umferð er um veginn, sérstaklega í seinni tíð. Hann liggur að vinsælum útivistarsvæðum, svo sem Heiðmörk og golfvöllum, og byggð nálægt honum hefur stóraukist á undanförnum árum. Fyrirhuguð er tenging hans við Urriðaholtshverfið í Garðabæ.
Heimild: Mbl.is
