PCC Seaview Residences, dótturfélag þýska fyrirtækisins PCC sem nú byggir kísilver á Bakka, á fráteknar lóðir fyrir íbúðir í nýju hverfi í suðurhluta Húsavíkur. Þar eru áform um byggingu um það bil 40 íbúða sem fyrirtækið ætlar sjálft að byggja.
Vönduð timburhús og hús úr vinnubúðaeiningum
Bæjaryfirvöldum í Norðurþingi barst nýlega erindi frá fyrirtækinu þar sem kom fram að það vildi minnka byggingarmagnið og að sveitarfélagið tæki yfir gatnagerð í hverfinu. Þá vill fyrirtækið fara tvær leiðir við byggingu húsa í hverfinu. „Núna í sumar komu fram ný áform, sem eru annarsvegar venjuleg íslensk og vönduð timburhús í öðrum hluta hverfisins. Í hinum hlutanum verði að einhverju leiti byggt úr vinnubúðaeiningum frá Reyðarfirði, sem hafa staðið þar síðastliðinn áratug,“ segir Óli Halldórsson, formaður byggðarráðs Norðurþings.
Telja þetta alls ekki koma til greina
Hann segir að byggðarráð og meirihluti sveitarstjórnar telji alls ekki koma til greina að fara þessa leið. „Þessi upphaflegu áform sem lagt var af stað með hérna í sumar, hugnuðust okkur mjög vel. Að þetta félag byggði vönduð íbúðarhús inni í hverfi hjá okkur. Það er eftir því sem við höfum verið að vinna.“
Stefnubreytingin kom á óvart
Óli segir að þessi stefnubreyting PCC Seaview Residences hafi komið mjög á óvart. Fulltrúar Norðurþings og fyrirtækisins munu í dag halda fund um þetta mál og þar segist Óli vonast eftir frekari skýringum.
Heimild: Ruv.is
