Mögulega úrelt verkaskipting á milli RARIK og Landsnets tefur uppbyggingu á nýjum raflínum til Þórshafnar og Víkur í Mýrdal. RARIK segir Landsnet ætla að skilja ákveðin landsvæði eftir í kerfisáætlun. Kostnaður eigi að dreifast á alla landsmenn.
RARIK gagnrýnir nýja kerfisáætlun Landsnets en þar er ekki gert ráð fyrir uppbyggingu á nýrri raflínu til Þórshafnar eða Víkur í Mýrdal á næstu árum. Svo virðist sem viðræður Landsnets og RARIK um nýja línu til Þórshafnar hafi siglt í strand og RARIK vill skýrari verkaskiptingu.
Bæði Þórshöfn og Vík í Mýrdal eru langt frá næsta afhendingarstað Landsnets og því þarf RARIK að sjá um að dreifa raforku þangað langa leið. Aukin notkun kallar á öflugri flutningslínur í stað RARIK-lína. Þær eru á lægri spennu en línur Landsnets. Vandamálið er að notkun á Þórshöfn og í Vík er ekki nógu mikil til að gjaldskrá RARIK beri mikla fjárfestingu í öflugri línum og RARIK telur eðlilegt að kostnaðurinn dreifist á alla landsmenn.
RARIK og Landsnet hafa reynt að semja um verkaskiptingu í uppbyggingu til Þórshafnar en miðað við umsögn RARIK um nýja kerfisáætlun Landsnets eru þær viðræður í hnút.
RARIK telur að allir landsmenn eigi að bera stærstu framkvæmdir í flutningskerfinu
RARIK telur eðlilegra að í vissum tilvikum taki Landsnet á sig óarðbærar framkvæmdir til að slíkur kostnaður dreifist á alla landsmenn. Ekki bara ákveðinn hóp sem eru viðskiptavinir RARIK. Fyrirtækið starfar bara í ákveðnum landshlutum. Til að mynda ekki á Höfuðborgarsvæðinu, Vestfjörðum og Suðurnesjum. RARIK ræðst reyndar oft í dýrar framkvæmdir fyrir fáa notendur og dreifir á viðskiptavini sína. Súr epli sem eru gjarnan kölluð fram þungar fjárfestingar.
En nú blasa við milljarðaframkvæmdir við nýjar línur til Þórshafnar og Víkur sem myndu kalla á umtalsverða hækkun á gjaldskrá RARIK. Fjárfestingaáætlun RARIK til næstu fimm ára hljóðar upp á níu milljarða á ári en 66 kv línur til Þórshafnar og Víkur gætu kostað átta milljarða.
Í umsögn RARIK segir að raforkulög miði að því að allir landsmenn greiði kostnað við uppbyggingu flutningskerfis. Landsnet hafi heimild til að krefja stórnotendur eða virkjanir um kerfisframlag, svo almennir notendur séu ekki að niðurgreiða framkvæmdir fyrir orkufyrirtæki eða einstakar verksmiðjur. Landsnet megi hins vegar ekki krefja dreifiveitur eins og RARIK um kerfisframlag.
Ekki hlutverk Landsnets að leggja línur í allar sveitir
RARIK tekur sterkt til orða og segir að ef Landsnet ætli að tala fyrir orkuskiptum og byggðaþróun um allt land þá verði fyrirtækið að þjónusta allt landið en ekki skilja ákveðin landsvæði eftir.
Viðbrögð Landsnets við þessu eru að fyrirtækið sé í góðu samstarfi við RARIK um afhendingu. Það hafi aldrei verið hugmyndin að Landsnet leggi línur inn í allar sveitir. Þá sé fyrirtækið komið inn á verksvið dreifiveitna. Viðræður við RARIK um þessi mál haldi áfram.
RARIK vill endurskoða verkaskiptingu
RARIK telur hins vegar að endurskoða þurfi verkaskiptingu, ekki bara miðað við spennustig flutningslína heldur líka fjarlægðir og fleira. RARIK spyr í umsögninni hvernig Landsnet líti á mörk dreifiveitu og flutningskerfis: „Tengist það spennustigi, afli, vegalengdum, væntum tekjum, arðsemi eða öðrum þáttum?“
Heimild: Ruv.is
