Vel fannst fyrir sprengingum í gær í grennd við Sigtún í Laugarneshverfinu. Sprengingarnar voru á tímabili á 20-30 mínútna fresti. Íbúi í Sigtúni segir sprengingarnar farnar að hafa áhrif á heimili sitt og íbúar í hverfinu séu farnir að hafa áhyggjur.
Sprengingarnar eru til komnar vegna stækkunar Grand hótels og byggingar bílakjallara fyrir íbúðarbyggð sem á að rísa á Blómavalsreitnum, en mbl.is hefur áður greint frá málinu.
Íbúar ekki upplýstir
Úlfar Snær Arnarson, íbúi í Sigtúni, segir fund hafa verið haldinn með íbúum í lok ágúst 2022 þar sem framkvæmdirnar voru kynntar. Var þá íbúum sagt að þeir yrðu upplýstir um þróun mála og að fleiri fundir yrðu haldnir. Það hefur hins vegar ekki verið gert.
Skömmu síðar, í nóvember 2022, hafi byrjað fleygun sem hafi valdið sífelldum hávaða frá morgni til kvölds. Segir Úlfar það þó hafa verið tímabundið og að hann hafi í raun verið einn af þeim sem vildu sjá verktaka fara í sprengingar til að drífa verkefnið áfram í stað þess að vera með stöðugan hávaða.
Öflugar sprengingar
„En mér kom samt á óvart hvað þetta voru öflugar sprengingar,“ segir Úlfar og bendir jafnframt á að sprengingarnar ættu að vera á tilsettum tíma og á klukkutíma fresti.
Í samtali við Morgunblaðið þann 22. maí sagði Magnús Hjálmarsson, sprengistjóri hjá Borgarvirki, að sprengt væri á klukkutíma fresti, eins og klukkan 9.55 og 10.55 og svo framvegis.
„Svo brá mér bara í morgun. Ég var heima hjá mér að vinna og þá var þetta farið að verða á svona rúmlega 20-30 mínútna fresti,“ segir Úlfar.
Hann nefnir þó að á Facebook-síðu Laugarneshverfisisins hafi verið bent á að hinar tíðu sprengingar hafi verið vegna sérstakra aðstæðna.
Fólk kannski langþreytt á upplýsingaleysi
Finnirðu eitthvað fyrir því þegar þú talar við nágrannana að það sé einhver pirringur yfir þessu?
„Fólk er held ég svolítið langþreytt á upplýsingaleysinu. Það er lítið tilkynnt eins og stór ökutæki sem taka hluta af svæðinu. Það er verið að grafa og moka og skyndilega er bara búið að setja upp einhverjar keilur og hindranir til að loka bílastæðum og það er varla sópuð gata hérna í Reykjavík án þess að það séu sett upp skilti þar sem það er sagt að fjarlægja bíla svo að það sé hægt að sópa. En í þessu tilfelli virðist vera hægt að setja upp alls konar keilur og merki til þess að afmarka svæði íbúa í götu fyrir verktaka,“ segir Úlfar og heldur áfram:
„Þetta virðist vera mjög vítt leyfi sem borgin gefur. Auðvitað ganga verktakar eins langt og þeir geta í sínum framkvæmdum, en það er aðallega borgin sem ég er að gagnrýna fyrir það eftirlitsleysi sem virðist vera. Vinnueftirlitið bendir á byggingarfulltrúa og þar virðist það bara vera þannig að þeir gefa út leyfi og svo er lítið eftirlit með því hvernig farið er að hlutunum. Kannski skortir eitthvað upp á reglugerðir eða annað hjá borginni.“
Þekkir hverja einustu sprungu
Þá segir hann aðspurður að betra væri að íbúar hverfisins væru betur upplýstir um þróun framkvæmdanna.
„Af því að maður veit að það eru mörg ár sem svona bygging tekur,“ segir Úlfar og nefnir jafnframt að Sigtún sé gömul gata sem hafi verið byggð fyrir 80 árum. Afi hans hafi byggt húsið sem hann býr í og hann sjálfur hafi lengi búið í því.
„Þannig að ég þekki hverja einustu sprungu í húsinu. Ég veit alveg hvaða áhrif þessar sprengingar hafa haft á húsið. Það er byrjað að gliðna og það koma sprungur, sérstaklega þar sem tréverk og steypa kemur saman. Þar eru að koma sprungur.“
Þá segir Úlfar það vera mikið áhyggjuefni að hristingur sem sprengingarnar bera með sér dynji á húsum sem eru orðin gömul.
„Ég held að allir hafi áhyggjur af því þarna í kring.“
Heimild: Mbl.is
