Góður gangur er í framkvæmdum og allt á áætlun við byggingu íþróttamiðstöðvar í Búðardal. Þessa dagana er verið að reisa burðarvirki hússins þar sem búningsaðstaða og þjónusturými verða.
Grindin að íþróttasalnum er þegar komin. Undir þaki í þessari samstæðu verða 1.335 m2. Svo bætist við útisvæði sundlaugar en byrjað verður að slá upp steypumótum að laugarkerinu eftir nokkrar vikur.
Framkvæmdir þessar hófust í sumarbyrjun í fyrra þegar skólakrakkar í Búðardal tóku fyrstu skóflustunguna. Þetta var nánar tiltekið þann 11. júní 2024, á 30 ára afmælisdegi sveitarfélagsins Dalabyggðar.
Samið var við byggingafyrirtækið Eykt um framkvæmdir og miðað er við að allt verði frágengið 4. febrúar á næsta ári. Áætlaður kostnaður er um 1,3 milljarðar króna.
Heimild: Mbl.is
