Þjótandi á Hellu átti lægsta tilboðið í jarðvinnu og lagnir við endurnýjun Hásteinsvallar í Vestmannaeyjum.
Tilboð Þjótanda hljóðaði upp á rúmar 116 milljónir króna. Eitt annað tilboð barst í verkið, frá Fagurverki ehf í Reykjavík, rúmar 129,7 milljónir króna.
Framkvæmda- og hafnarráð Vestmannaeyja samþykkti á fundi sínum í síðustu viku að ganga til samninga við Þjótanda.
Þjótandi byrjar á jarðvinnunni nú í janúar en Hásteinsvöllur á að vera tilbúinn til notkunar þann 1. maí næstkomandi.
Gervigrasmottan og útlagning hennar verður boðin út í byrjun janúar en lagning gervigrassins á að hefjast þann 1. apríl og tekur um fjórar vikur. Næsta vetur á svo að setja upp flóðlýsingu á vellinum sem verður tilbúin í maí 2026.
Heimild: Sunnlenska.is
