Raunverðshækkanir á íbúðamarkaði síðastliðna tólf mánuði mælast nú 4,4%.
Vísitala íbúðaverðs hækkaði um 0,75% á milli júní og júlí, samanborið við 1,4% hækkun í júní og maí. Árshækkun vísitölunnar mælist nú 11,0% samanborið við 9,1% í síðasta mánuði.
„Raunverðshækkun íbúðaverðs nam 4,4 prósentum í júlí, en til samanburðar nam hún 3,1 prósenti í júní og 2 prósentum í maímánuði,“ segir í frétt á vef HMS.
„Raunhækkun íbúðaverðs er drifin áfram af verðhækkunum á landinu öllu, en íbúðaverð hækkaði umfram verðbólgu bæði á höfuðborgarsvæðinu og á landsbyggðinni.“
HMS gefur út fjórar undirvísitölur yfir verð á fjölbýli og sérbýli á höfuðborgarsvæðinu annars vegar og landsbyggðinni hins vegar.
Fjölbýli á höfuðborgarsvæðinu hækkaði um 0,1% milli mánaða og hefur nú hækkað um 11,5% á ársgrundvelli. Í júlí hækkaði sérbýli á höfuðborgarsvæðinu um 0,9% milli mánaða og hefur nú hækkað um 13,7% á síðustu tólf mánuðum.
Undirvísitala yfir fjölbýli á landsbyggðinni hækkaði um 2,6% milli mánaða og hefur hækkað um 11,5% á síðustu tólf mánuðum. Sérbýli á landsbyggðinni hækkaði um 1,2% á milli mánaða og hefur nú hækkað um 11,8% á ársgrundvelli.
Heimild: Vb.is
