Vilja Fjarðagöng fremur en Fjarðarheiðargöng

„Við undirrituð skorum á samgönguyfirvöld að Fjarðagöng Seyðisfjörður/Mjóifjörður/Neskaupstaður verði sett í forgang á samgönguáætlun,“ segir í texta undirskriftalistans. Söfnunin fram fer á vefsíðunni Ísland.is. Ábyrgðarmaður er Erlendur Magnús Jóhannsson.

Í tilkynningu frá Erlendi segir að á Facebook-síðunni Jarðgöng á Austurlandi hafi komið fram að mikill stuðningur sé við að þessi leið verði valin umfram Fjarðarheiðargöng til að sameina Mið-Austurland og gera það að einu atvinnusvæði og rjúfa vetrareinangrun Mjóafjarðar í leiðinni.

Sjálfur er Erlendur Mjófirðingur sem búið hefur í Neskaupstað um árabil, að því er fram kemur í héraðsmiðlinum Austurfrétt.

Vitnað er í erindi Einars Þorvarðarsonar, fyrrverandi umdæmisverkfræðings Vegagerðarinnar á Austurlandi, til samgönguyfirvalda síðastliðið sumar.

Þar segir Einar að góð samstaða virðist almennt vera um að næstu jarðgöng eigi að vera til að losa um einangrun Seyðisfjarðar. Tvennt komi til greina, Fjarðarheiðargöngin eða Fjarðagöngin.

„Í báðum tilfellum losnar fullkomlega um vetrareinangrun og Seyðisfjörður fær láglendistengingu við almenna vegakerfið. Hinsvegar er mikill munur hvað varðar kostnað og samfélagsáhrif.

Með allskonar undanbrögðum og sérkennilegum rökum hafa stjórnvöld komið sér undan því að bera þessa kosti saman, nú síðast eins og fram kemur í skýrslu sem Vegagerðin fékk RHA til að gera. Í skýrslunni segir að óþarft sé að bera þessa tvo kosti saman því búið sé að ákveða að ráðast í þá báða!,“ segir Einar.

Hann segir að framundan sé hjá Alþingi að taka tillögu að samgönguáætlun til umræðu og afgreiðslu.

„Ef sú umræða á að vera vitræn og koma að einhverju gagni verður að liggja fyrir samanburður þessara tveggja kosta hvað varðar kostnað, arðsemi og samfélagsáhrif, ekki hvað síst vegna þess að engar líkur eru til þess að ráðist verði í að framkvæma báða þessa kosti um langa framtíð.

Einnig þarf að gera umferðarspá fyrir báða kosti og gera grein fyrir fjármögnun þeirra með tilliti til hugsanlegra vegtolla eins og rætt hefur verið um,“ segir í erindi Einars þar sem hann skorar á samgönguyfirvöld að láta gera þennan samanburð.

„Í framhaldinu tel ég rétt að fram fari rækileg kynning á báðum kostum og síðan skoðanakönnun meðal íbúa þeirra sveitarfélaga sem þetta snertir mest, það er Múlaþings og Fjarðabyggðar.

Þannig er helst hægt að komast að skynsamlegri niðurstöðu um hvorn kostinn á að velja og skapa þá samstöðu og einingu sem nauðsynleg er, þegar ráðist er í svona viðamiklar framkvæmdir, samstöðu sem stjórnvöldum vegamála hefur ekki tekist hingað til,“ segir í bréfi Einars, sem ábyrgðarmaður undirskriftasöfnunarinnar vitnar til.

Fjallað var um þessa tvo valkosti í þættinum Ísland í dag fyrr á árinu:

Heimild: Visir.is