Skipulag í nýju fangelsi á að minnka líkur á átökum

Skipulag nýs fangelsis að Litla-Hrauni er ætlað að draga stórlega úr líkunum á því að út brjótist átök á milli fanga eins og reglulega gerist.

<>

Tilkynnt var í dag að bráðlega verði ráðist í að byggja nýtt fangelsi, rétt austan við Litla-Hraun. Skipulag þess gamla er langt frá því að fullnægja kröfum samtímans um mannsæmandi aðstæður.

Á það bæði við um þá sem þarna búa og starfsmenn. Í miðju porti Litla-Hrauns er torg þar sem allir fangar geta átt leið um. Og þar verða reglulega átök. Halldór Valur Pálsson er forstöðumaður Litla-Hrauns:

„Menn sem kannski rekast illa saman og við þurfum að tryggja öryggi þeirra beggja og öryggi annarra fanga getur þýtt að það verða árekstrar. Og þá er svona torg sem er svona miðja í stofnun þar sem allir hittast mjög óæskilegur staður.“

Ráðið við þessu, segir Halldór, er að skipta hópnum betur upp. Til þessa verður horft við hönnun á nýju fangelsi. „Að húsið, eða byggingarnar, þær leysi þetta verkefni fyrir okkur; að skipta hópnum upp. Og við þurfum þá ekki að vera upptekin af því alla daga með okkar mannskap að tryggja öryggi þeirra.“

Heimild: Ruv.is