„Það kæmi mér ekkert á óvart að fasteignaverð gefi eitthvað eftir, ekki bara í rauntölum heldur í íslenskum krónum. Að það verði einhver lækkun,“ sagði Már Wolfgang Mixa, lektor í viðskiptafræði við Háskóla Íslands á Morgunvaktinni á Rás 1 í morgun.
Hann segist heyra svipaða frasa nú og á árunum fyrir hrun, til að mynda frasann „fasteignir lækka aldrei í verði“. Fólk teygi sig heldur langt í kaupum á fasteignum hér á landi.
Vísbendingar eru um lækkun fasteignaverðs í löndunum í kringum okkur. Til að mynda hafi fasteignaverð lækkað um nokkur prósent í Svíþjóð og vísbendingar séu um lækkanir á mörkuðum í Bandaríkjunum. Vaxtastig hækki einnig mikið þessa dagana og fasteignalán séu að verða dýrari hér á landi.
„Þetta er ekki dómsdagspá en það má frekar líta á þetta sem aðvörun um að fólk eigi ekki að treysta á stöðugt virði húsnæðis,“ segir Már að lokum.
Heimild: Ruv.is
