Mygla er komin upp í þaki og burðarvirki GAJU, gas- og jarðgerðarstöð Sorpu í Álfsnesi.
Framkvæmdastjóri og stjórnarformaður Sorpu telja að mistök hafi verið gerð í hönnunarferli stöðvarinnar sem hóf starfsemi í fyrra.
Sæmundur Sæmundsson, framkvæmdastjóri EFLU sem sá um hönnun stöðvarinnar, er staddur erlendis en svaraði spurningum fréttastofu skriflega.
Í svari hans segir að við hönnun hafi verið stuðst við forsendur frá Sorpu og ráðgjöfum þeirra. Í útboðsgögnum hafi húsinu verið lýst og tekið fram að nota ætti límtré og timbureiningar í þakvirki hússins.
Orðrétt segir Sæmundur: „EFLA benti á í upphafi verkefnisins að verkkaupi væri að taka áhættu með efnisvali sínu og taldi uppbyggingu með öðrum efnum henta betur starfseminni.“
Fréttastofa spurði Sæmund, hvort á einhverjum tímapunkti í hönnunarferlinu hefðu vaknað spurningar um mögulega myglumyndun, í ljósi þeirrar starfsemi sem fram fer í GAJU.
Sæmundur svarar: „Í hönnunarferlinu benti EFLA á áhættu tengda efnisvali verkkaupa.“
Fréttastofa spurði einnig út í aðkomu starfsmanna og stjórnar Sorpu í hönnunarferlinu.
Kemur fram í svari Sæmundar að fulltrúar Sorpu hafi tekið þátt á hönnunarfundum og rýnt öll skilagögn EFLU í hönnunarferli hússins.
Heimild: Ruv.is
