Vegagerðin áformar að bjóða út fjórar af helstu framkvæmdum ársins á Austurlandi á næstu þremur vikum. Útboð um nýja brú yfir Gilsá í Skriðdal var auglýst um helgina.
Í útboðslýsingu fyrir framkvæmdina kemur fram að gera eigi nýjan veg á 1,2 km kafla auk 46 metra langrar brúar.
Útboðsgögnin eru aðgengileg frá og með deginum í dag. Mánuður er gefinn til að skila inn tilboðum. Gert er ráð fyrir að verkinu verði lokið 15. ágúst á næsta ári.
Þar með eru hafin útboð á stórframkvæmdum á Austurlandi í sumar. Þykir mörgum það fullseint á ferðinni, meðal annars sveitarstjórn Múlaþings, sem gagnrýndi tafirnar á síðasta fundi sínum.
Í svari við fyrirspurn Austurfréttar segir Sveinn Sveinsson, umdæmisstjóri Vegagerðarinnar, að því miður hafi undirbúningur útboðsverkanna tekið talsvert lengri tíma en áætlað var.
Þar spili margt inn í: Verkin hafi að hluta til verið meiri og flóknari en upphaflega var talið, til dæmis vegna ýmissa forrannsókna, athugana á efnistöku auk samskipta við stofnanir og aðra hagsmunaaðila.
Þá hafa forföll og þar með mannaskipti í verkefnum einnig haft áhrif.
Eftir viku, 5. júlí, verður auglýst útboð á Borgarfjarðarvegi. Til til stendur að endurbyggja 14,8 km kafla milli Eiða og Laufáss.
Þann 12. júlí verða síðan auglýst útboð á annars vegar 4 km kafla milli Gilsár og Arnórsstaða á Jökuldal hins vegar öðrum 5 km um Ásklif í Fellum.
Áætluð verklok í öllum þessum framkvæmdum eru árið 2022.
Heimild: Austurfrétt.is
