Vegna vinnu við rafdreifikerfið, til að mæta mikilli uppbyggingu í Vogabyggð, verður rafmagn tekið af skólpdælustöðinni við Gelgjutanga mánudaginn 10. maí, kl. 06:00-08:00.
Dælustöðin verður óstarfhæf á meðan og því þarf að veita óhreinsuðu skólpi í sjó við Elliðavog og Arnarvog. Þetta kemur fram í tilkynningu frá Veitum.
„Losun skólps í sjó í skamman tíma hefur ekki varanleg áhrif á lífríkið og örverur í skólpi lifa einungis örfáar klukkustundir í sjónum.
Rusl í skólpi er stærra vandamál. Það velkist um í sjónum og getur skolað upp í fjörur. Fólk er því minnt á að ekkert á að fara í klósett nema líkamlegur úrgangur og klósettpappír.
Sett verða upp upplýsingaskilti á nokkrum stöðum á gönguleiðum í kringum dælustöðina svo fólk haldi sig fjarri sjónum. Einnig verður fylgst með fjörum á svæðinu næstu daga og ef rusl hefur borist í þær verður það hreinsað,“ segir í tilkynningu.
