Bjarg íbúðafélag afhenti í gær fyrsta leigjandanum lykla að nýrri íbúð. Alls fá í júní og júlí 68 leigjendur afhenta lykla að nýjum íbúðum.
Alls eru nú 563 íbúðir í byggingu á vegum félagsins og 490 til viðbótar í hönnunarferli. 1.150 eru á biðlista eftir íbúð.
Bjarg íbúðafélag afhenti í gær fyrsta leigjandanum lykla að nýrri íbúð. Alls fá í júní og júlí 68 leigjendur afhenta lykla að nýjum íbúðum.
Fyrsti leigjandinn er Katrín Einarsdóttir sem er tveggja barna móðir. Katrín hefur búið um nokkurt skeið í einu herbergi heima hjá foreldrum sínum ásamt börnum sínum, sem eru fjögurra og tíu ára gömul, og segir því kærkomið að komast í nýja íbúð hjá Bjargi.
„Ég sá þetta í fréttunum fyrir um ári síðan og sótti um. Ég fékk svo að vita um áramótin að mér hefði verið úthlutað,“ segir Katrínu í samtali við Fréttablaðið í dag.
Hún segir að hún hafi fengið að líta inn í íbúðina fyrr á árinu en þá hafi hún verið langt frá því að vera tilbúin en henni lítist rosalega vel á. Katrín segist vera ánægð með hverfið og vera spennt að flytja inn.
„Ég hef áður búið í Grafarvoginum og líkar vel við. Þetta er mjög barnvænt hverfi,“ segir Katrín.
Flytur inn í kvöld
Katrín býst fastlega við því að hún muni flytja inn strax eftir að afhendingarathöfninni er lokið. Aðrir íbúar fá afhentar íbúðir sínar þann 1. júlí þannig Katrín verður ein í húsinu þar til um mánaðarmótin.
Íbúðin sem Katrín fékk er þriggja herbergja og er leiguverðið um 160 þúsund krónur á mánuði.
„Leigan er reiknuð út frá tekjum. Það eru reiknaðar tekjur síðasta árs og svo er leigan prósenta af því. Þetta er því töluvert hagstæðara en almenni leigumarkaðurinn,“ segir Katrín.
Fram kemur á heimasíðu Bjargs að greiðslubyrði leigu muni ekki fara umfram 25 til 30 prósent af heildartekjum að teknu tilliti til húsnæðisbóta.
1.150 á biðlista eftir íbúð
Bjarg íbúðafélag var stofnað af Alþýðusambandi Íslands og BSRB árið 2016 með það að markmiði að byggja upp leiguhúsnæði fyrir tekjulægri félagsmenn þessara heildarsamtaka launafólks.
Alls eru nú 563 íbúðir í byggingu á vegum félagsins og 490 til viðbótar í hönnunarferli.
Fram kemur í tilkynningu frá Bjarg að þau áformi að halda uppbyggingu húsnæðis áfram í samræmi við þörf og fjármagn. Sveitarfélög vinna húsnæðisáætlanir til að meta þörfina og er Bjarg í góðu samstarfi við þau um frekari uppbyggingu á næstu árum.
Um 1.150 félagsmenn ASÍ og BSRB eru nú á biðlista eftir íbúðum svo ljóst er að þörfin fyrir leiguhúsnæði til langs tíma á hagkvæmu verði er mikil.
„Verkalýðshreyfingin hefur enn og aftur tekið frumkvæði að því að bjóða hagkvæmari íbúðir fyrir vinnandi fólk á Íslandi. Það er afar ánægjulegt að sjá þetta verkefni verða að veruleika og ég veit að Bjarg mun gera fjölda fólks kleift að búa í mannsæmandi húsnæði á viðráðanlegum kjörum. Þetta er gleðidagur og vísir að því sem koma skal,“ sagði Drífa Snædal, forseti ASÍ við athöfnina.
„Það er virkilega ánægjulegt að sjá hér í dag afraksturinn af þeirri miklu vinnu sem unnin hefur verið á þeim þremur árum sem liðin eru frá því Bjarg var stofnað. Uppbygging félagsins sýnir að það er vel hægt að byggja upp leigufélög hér á landi sem ekki eru rekin í hagnaðarskyni.
Nú eru fyrstu leigjendurnir að flytja inn og við hlökkum til að bjóða mun fleiri velkomna í hópinn á komandi mánuðum og árum,“ sagði Sonja Ýr Þorbergsdóttir, formaður BSRB.
Mikil uppbygging fram undan
Framkvæmdir við 563 íbúðir eru nú í fullum gangi við Móaveg, Urðarbrunn, í Úlfarsárdal við Hallgerðargötu og í Hraunbænum í Reykjavík, sem og á Akranesi og á Akureyri.
Áætlað er að afhenda leigjendum 141 íbúð til viðbótar í ár eftir því sem húsnæðið verður tilbúið. Þær íbúðir eru við Móaveg, í Asparskógum og í Urðarbrunni.
Unnið er að hönnun 490 íbúða til viðbótar í Bryggjuhverfinu, Gelgjutanga, og Skerjafirði í Reykjavík, og í Hafnarfirði, Þorlákshöfn, Sandgerði og á Selfossi.
Heimild: Frettabladid.is
