Grasflötur í Grafarvogi þar sem nýtt sjúkrahús á að rísa stendur enn auður. Framkvæmdir áttu að hefjast fyrir tveimur árum en hafa tafist í skipulagi Reykjavíkurborgar, að sögn heilbrigðisráðherra.
Árið 2021 skrifuðu Svandís Svavarsdóttir, þáverandi heilbrigðisráðherra, og Dagur B. Eggertsson borgarstjóri undir samkomulag um að hefja byggingu hjúkrunarheimilis við Mosaveg í Grafarvogi.
Engar framkvæmdir hafist
Fyrirhugað hjúkrunarheimili á að hýsa allt að 144 íbúa og var áætlaður kostnaður við framkvæmdina 7,7 milljarðar króna þá – sem væru í dag 9,2 milljarðar ef marka má verðlagsreiknivél hagstofunnar.
Fyrirhugað var að ríkið myndi leggja til 85% þeirrar upphæðar á móti 15% framlagi Reykjavíkurborgar. Stefnt var að því að framkvæmdir myndu hefjast um mitt árið 2021 og að nýtt hjúkrunarheimili yrði tekið til notkunar á síðari hluta ársins 2026.
Aftur á móti hafa engar framkvæmdir hafist á grasfletinum við Mosaveg.
„Eiginlega á núllpunkti“
Willum Þór Þórsson heilbrigðisráðherra lét þau orð falla á Alþingi í vikunni að framkvæmdir á hjúkrunarheimilinu væru „eiginlega á núllpunkti“.
„Þetta hefur tafist í skipulagi hjá Reykjavíkurborg. Ég kann ekki að útskýra það,“ segir Willum við mbl.is, spurður hvað hann meinti með ummælum sínum á Alþingi.
„Og það er bara miður að það hafi tafist. Miður fyrir alla.“
Bætir hann við að enn þurfi að fara í jarðvegsrannsóknir á svæðinu. Lengra séu framkvæmdirnar ekki komnar.
Framkvæmdir við Ártúnshöfða eiga að hefjast í ár
Samhliða undirritun samnings um hjúkrunarheimili við Mosaveg staðfestu ráðherra og borgarstjóri viljayfirlýsingu um byggingu hjúkrunarheimilis fyrir allt að 200 íbúa á svæði við Ártúnshöfða í Reykjavík.
Í tilkynningu frá Stjórnarráðinu sagði á sínum tíma að unnið væri að vinnu við skipulagningu svæðisins og var stefnt að því að hægt yrði að hefja verklegar framkvæmdir við nýtt hjúkrunarheimili árið 2023. Það er árið í ár, eins og glöggir lesendur vita.
Heimild: Mbl.is
