Í nýrri íbúðatalningu Samtaka iðnaðarins og Húsnæðis- og mannvirkjastofnunar kemur fram að framkvæmdir eru hafnar við byggingu 8.113 íbúða á landinu öllu.
Það er fjölgun um 11,7 prósent frá síðustu talningu, en þá voru 7.260 íbúðir í byggingu.
Í Reykjavík eru 2.433 íbúðir í byggingu en annars staðar á höfuðborgarsvæðinu eru þær 3.263 talsins. Höfuðborgarsvæðið stendur því að baki 70,2 prósentum af öllum íbúðum sem verið er að reisa um þessar mundir.
Eins og sést á myndinn að ofan eru langflestar íbúðirnar í öðrum sveitarfélögum á höfuðborgarsvæðinu en Reykjavík. En í síðustu talningum hefur Reykjavíkurborg verið með flestar íbúðir í byggingu.
Á landsbyggðinni hefur íbúðum í byggingu fjölgað hlutfallslega mest eða um 37,6 prósent frá síðustu talningu.
Í nágrannasveitarfélögum höfuðborgarsvæðisins eru 1.516 íbúðir í byggingu.
Í talningunni er lagt mat á framvindu hverrar íbúðar í þeim tilgangi að fá betri yfirsýn yfir hvenær áætlað er að þær komi á markað.
Út frá talningunni eiga 1.229 íbúðir að vera tilbúnar á þessu ári og 3.169 íbúðir á því næsta.
Þá gera HMS og SI ráð fyrir að 3.240 íbúðir verði fullbúnar árið 2024.
Á höfuðborgarsvæðinu öllu eru, sem fyrr segir, um 5.700 íbúðir í byggingu. Af þeim eru tæplega 4.400 íbúðir komnar lengra en framvindustig eitt. Það gefur til kynna að fullbúnum íbúðum gæti fjölgað á næstu misserum.
Af þeim íbúðum sem eru á seinni framvindustigum eru yfir 90 prósent í fjölbýli.
Heimild: Frettabladid.is
