„Svona við fyrsta mat þá sýnist okkur þetta vera sýnu verra eftir þennan þunga vetur, án þess að geta sett mælistiku á það nákvæmlega,“ segir Óskar.
Veturinn var snjóþungur og miklar leysingar í kjölfarið fór ekki vel með göturnar. Viðhald á gatnakerfinu kostar sitt og í fyrra var framkvæmt fyrir hærri upphæðir en áður.
„Heildarupphæðin þar var ríflega 8 milljarðar króna sem helgast af meðvitaðri ákvörðun að auka hlutfall malbiks.“
Malbikið er þrisvar sinnum dýrara en klæðningin enda slitsterkara. Þá hjálpaði góð tíð í fyrra til að lengja framkvæmdatímann. En hve miklum fjármunum verður varið í framkvæmdir í ár?
„Við erum að gera ráð fyrir að setja í bundið slitlag hjá okkur í ár fyrir rétt rúmlega fjóra milljarða króna.“
Hefðuð þið þurft meira?
„Já hjá Vegagerðinni í tæknideildinni erum við sífellt að benda á að sinna viðhaldi á þeim mannvirkjum sem við höfum verið að byggja upp síðustu áratugi. Það er okkar hlutverk að benda á að setja meiri fjármuni í þessa hluti.“
Undanfarna daga hefur verið unnið að holufyllingum en það styttist í stórtækari framkvæmdir.
„Við viljum að sjálfsögðu að fólk fari varlega í umferðinni og fylgist með ef það er eitthvað óvænt á vegum landsins að vera á varðbergi gagnvart því,“ segir Óskar Örn Jónsson, forstöðumaður framkvæmdadeildar Vegagerðarinnar.
Heimild: Ruv.is
