Enn er bið á að umferð verði hleypt á nýja hringveginn um Hornafjarðarfljót. Framkvæmdir hafa staðið yfir frá 2020 en verkið hófst formlega árið 2017 með samningum við landeigendur.
Vegagerðin greindi frá því í fyrrasumar að framkvæmdum við nýjan hringveg um Hornafjörð myndi ljúka fyrir árslok. Vetrarveður kom í veg fyrir að það tækist að ljúka verkinu fyrir áramót og Vegagerðin tilkynnti að því yrði lokið í vor.
G. Pétur Matthíasson, upplýsingafulltrúi Vegagerðarinnar, segir að framkvæmdir séu ekki hafnar aftur. Verktaki bíði eftir að frost fari úr jörðu og lofthiti verði nægilegur til að leggja klæðninguna á kaflann sem út af standi. Eftir er að leggja seinna lag klæðningar á um tveggja kílómetra langan vegarkafla og verklok hafa ekki verið tímasett.
Nýi vegurinn styttir hringveginn um 12 kílómetra og einbreiðum brúm á hringveginum fækkar um þrjár. Framkvæmdir hafa staðið yfir frá 2020 enda er verkið viðamikið. Fjórar nýjar brýr voru smíðaðar og vegarkaflinn er um 19 kílómetra langur.
Vegagerðin
Heimild: Ruv.is
