Vegagerðin býður út endurbyggingu Hringvegar um Hvolsvöll
Vegagerðin hefur boðið út endurbyggingu Hringvegar (1) um Hvolsvöll. Verkið felst í endurgerð um 800 metra langs kafla Hringvegar frá afleggjara að tengivirki Landsnets austur fyrir Dufþaksbraut í Rangárþingi eystra, ásamt endurbótum á gatnamótum og lagningu nýrra göngu- og hjólastíga.
Framkvæmdin nær einnig til gatnamóta við Hvolsveg og Hlíðarveg og er ætlað að bæta bæði umferðaröryggi og aðgengi fyrir gangandi og hjólandi vegfarendur. Slitlag á nýjum vegkafla verður malbik.
Umfangsmiklar framkvæmdir
Helstu magntölur verksins eru:
- Fyllingar: 5.000 m³
- Skeringar: 15.000 m³
- Ofanvatnslagnir: 1.200 m
- Styrktarlag: 9.200 m³
- Burðarlag: 1.400 m³
- Malbik: 2.650 tonn
- Umferðareyjar: 6.000 m²
- Ljósastaurar: 46 stk.
Verkinu skal að fullu lokið fyrir 1. september 2027.
Tilboðum skilað 7. júlí
Útboðsgögn eru aðgengileg í rafræna útboðskerfinu TendSign frá 23. júní 2026.
Tilboðum skal skila rafrænt í TendSign fyrir klukkan 14:00 þriðjudaginn 7. júlí 2026. Ekki verður haldinn sérstakur opnunarfundur en bjóðendum verður tilkynnt um nöfn þátttakenda og fjárhæð tilboða að loknum tilboðsfresti.
Heimild: Vegagerðin
