Skóflustunga nýrrar legudeildar við Sjúkrahúsið á Akureyri
Alma Möller heilbrigðisráðherra, Guðmundur Viðar Gunnarsson og Hjalti Steinþórsson frá GV- Gröfum undirrituðu í dag verksamning við Nýjan Landspítala ohf. um jarðvinnu vegna byggingar nýrrar legudeildar við Sjúkrahúsið á Akureyri.
Þetta kemur fram í tilkynningu. Samninginn vottuðu Guðjón Hauksson, forstjóri SAk og Sigríður Inga Rúnarsdóttir, hjúkrunarfræðingur hjá SAk.
Að undirritun lokinni tók ráðherra skóflustungu ásamt Jóhannesi G. Bjarnasyni, formanni Hollvinasamtaka SAk, Guðmundu Birnu Kristjánsdóttur, sjúkraliða SAk, Gunnari Svavarssyni, framkvæmdastjóra NLSH, Guðjóni Haukssyni, forstjóra SAk, Valdísi Eyju Pálsdóttur, formanni Geðverndarfélags Akureyrar og Árna Jóhannessyni, lækni SAk.
Legudeildarbyggingin verður 13.600 m²
Legudeildarbyggingin verður 13.600 m² en í nýbyggingunni, sem tengist núverandi húsnæði, verður komið upp aðstöðu fyrir skurðlækningadeild þar sem verða 36 stofur, lyflækningadeild með 36 stofur og geðdeild með 12 sjúkrastofum og tveimur öryggiseiningum fyrir geðgjörgæslu, ásamt stoðrýmum og dag- og göngudeild geðdeildar.
Gert er ráð fyrir að nýbyggingin verði staðsett sunnan við núverandi byggingar á lóð SAk og tengd núverandi húsnæði.
Minniháttar breytingar verða gerðar á núverandi húsnæði vegna tengingar við nýbyggingu og breytinga á vörumóttöku.
Nýbyggingin mun taka yfir núverandi bílastæði á lóðinni og þarf að færa þau bílastæði til ásamt því að fjölga bílastæðum miðað við aukið byggingarmagn á lóðinni.
Heimild: Mbl.is
Efni: Skóflustunga nýrrar legudeildar við Sjúkrahúsið á Akureyri
