Eitt tilboð barst í verkhönnun á bráðabirgðaleiðum vegna framkvæmda við Sæbraut í stokk. Um er að ræða gerð verkhönnunargagna fyrir niðurrif, aðstöðusköpun og hjáleiðir.
Vegna verkefnisins þarf að ráðast í uppkaup fasteigna næst Sæbraut.
Tilboðið var frá verkfræðistofunni Eflu hf. Reykjavík og hljóðaði upp á rúmlega 101 milljón króna. Var tilboðið rétt undir áætluðum verktakakostnaði Vegagerðarinnar sem var 105,3 milljónir króna.
Verkinu skal að fullu lokið 30. nóvember 2026.
Fyrirhugað er að Sæbraut verði sett í stokk á um 1.000 metra löngum kafla sem nær frá Miklubraut og norður fyrir gatnamót Kleppsmýrarvegar og Skeiðarvogs (við Húsasmiðjuna).
Heimild: Mbl.is
