Framkvæmdir við stækkun Grensásdeildar á lokastigi – verklok áætluð í haust
Framkvæmdir við stækkun Grensásdeildar ganga samkvæmt áætlun og eru nú komnar á lokastig byggingaframkvæmda. Húsið er að mestu orðið veðurþétt og megináherslan hefur færst yfir á innri frágang, uppsetningu búnaðar og undirbúning fyrir gangsetningu tæknikerfa.
Ytri byrði byggingarinnar er nær fullfrágengin og unnið er að síðustu verkþáttum utanhúss samhliða því sem framvindan innanhúss heldur áfram af fullum krafti.
Innréttingar og tæknikerfi langt komin
Innan dyra stendur yfir uppsetning innréttinga víða um bygginguna. Jafnframt er unnið að frágangi rafkerfa, lagna, stjórnkerfa og annarra tæknilegra innviða sem nauðsynlegir eru fyrir starfsemi deildarinnar.
Samhliða er verið að ljúka frágangi einstakra rýma og undirbúa húsnæðið fyrir næstu áfanga verkefnisins.
Prófanir og gangsetning fram undan
Á næstu mánuðum verður megináhersla lögð á gangsetningu og prófanir tæknikerfa hússins. Slík vinna er lykilþáttur í undirbúningi afhendingar mannvirkisins og tryggir að öll kerfi starfi samkvæmt kröfum áður en starfsemi hefst í nýju húsnæði.
„Framkvæmdir hafa gengið vel og eru í góðu samræmi við gildandi verkáætlun. Nú er verkefnið komið á það stig að megináhersla er á frágang innanhúss, uppsetningu búnaðar og undirbúning gangsetningar og prófana á kerfum byggingarinnar og verklok eru áætluð í haust,“ segir Kristinn Jakobsson, verkefnastjóri hjá NLSH.
Mikilvæg uppbygging fyrir endurhæfingarþjónustu
Stækkun Grensásdeildar er hluti af umfangsmikilli uppbyggingu heilbrigðisinnviða á höfuðborgarsvæðinu. Með nýju húsnæði verður aðstaða fyrir endurhæfingarþjónustu bætt verulega og skapaður betri rammi fyrir starfsemi deildarinnar til framtíðar.
Heimild: NLSH.is
Efni: Framkvæmdir við stækkun Grensásdeildar á lokastigi – verklok áætluð í haust
