Framkvæmdastjóri hjá Landsvirkjun segir ekki útilokað að ákveðnir aðilar haldi áfram að leita leiða til að stoppa Hvammsvirkjun. Sífellt minna sé þó hægt að kæra.
Leyfisveitingarferli Hvammsvirkjunar, sem Landsvirkjun hyggst reisa í neðri hluta Þjórsár, hefur staðið yfir um langt skeið. Rangárþing ytra veitti framkvæmdaleyfi í febrúar og Skeiða- og Gnúpverjahreppur fylgdi í kjölfarið í síðustu viku.
Gildandi virkjunarleyfi, það þriðja frá upphafi, var gefið út í desember síðastliðnum. Ásbjörg Kristinsdóttir, framkvæmdastjóri framkvæmda hjá Landsvirkjun, segir þetta vera stóran áfanga.
„Auðvitað er það ekki ákjósanlegt að vera með svona stórar framkvæmd undir ef leyfismál eru óviss. Um leið og leyfin liggja fyrir og maður finnur fyrir miklum stuðningi við verkefnið, þá styður það við þann áhættuvilja sem fyrirtækið hefur til þess að halda áfram með þessa framkvæmd,“ segir hún.
Undirbúningsframkvæmdir hafa staðið yfir um nokkurt skeið og halda áfram á komandi mánuðum. Nýverið fór fram útboð vegna graftrar og jarðvinnu á svæðinu og bárust sex tilboð í verkið. Að sögn Ásbjargar stendur til að undirrita verksamning síðar í vikunni og gætu framkvæmdir hafist skömmu síðar.
Þegar hefur verið lokið við vinnslu efnis til vegagerðar úr efsta hluta frárennslisskurðar, gerð aðkomuvegar að virkjuninni og að leggja til hliðar efni sem nýtt verður í vegaframkvæmdum Vegagerðarinnar við Búðafossveg og nýja brú yfir Þjórsá.
Þegar öll tilboð í framkvæmdina liggja fyrir mun stjórn Landsvirkjunar taka ákvörðun um að heimila formlegar virkjunarframkvæmdir. Stefnt er að útboði allra verkþátta í ár og miðað er við að virkjunin verði gangsett í lok árs 2030.
Ítrekaðar kærur frá aðilum sem eru mótfallnir Hvammsvirkjun hafa í gegnum tíðina tafið framkvæmdirnar. Spurð hvort búast megi við frekara kæruferli segir Ásbjörg erfitt að svara því.
„Ég held að stutta svarið sé að við búum okkur undir það að þau leiti áfram leiða til þess að kæra þetta verkefni en eftir því sem kærunum fjölgar þá fækkar líka hlutum sem hægt er að kæra,“ segir hún og bendir einnig á að þær kærur sem hafi komið fram í gegnum tíðina hafi verið vegna leyfisveitinga en ekki vegna sjálfrar virkjunarframkvæmdarinnar.
Þá hafi Landsvirkjun að eigin frumkvæði gripið til mótvægisaðgerða til að bregðast við áhrifum virkjunarinnar og lagt áherslu á samráð í öllu ferlinu.
„Við gerum okkur vel grein fyrir því að það eru öll augu á okkur, að það verði vel að öllu staðið þarna. Við skorumst ekkert undan þeirri ábyrgð og förum stolt áfram inn í þessa framkvæmd,“ segir Ásbjörg.
Heimild: Vb.is
