Reitir fasteignafélag hf. hefur í bréfi til Reykjavíkurborgar óskað eftir að afstaða verði tekin til tillögu um nýtt skipulag og uppbyggingu á lóð norðan megin við Kringluna.
Í samvinnu við Nordic arkitekta hafi verið unnin staðháttagreining og tillaga að nýrri 10 hæða skrifstofubyggingu, samtals um 8.740 fermetrar.
Tillagan byggist á forsendum samgöngumiðaðrar þróunar og leggi áherslu á sterka tengingu við fyrirhugaða biðstöð borgarlínu við Miklabraut og aðgengi frá öllum samgöngumátum, gangandi, hjólandi, með almenningssamgöngum og bílum.
Skipulagsfulltrúi Reykjavíkur tekur jákvætt í hugmyndir um að skerpa ásýnd verslunarmiðstöðvarinnar Kringlunnar með viðbyggingu sem marki með skýrari hætti inngang fyrir gangandi og hjólandi vegfarendur frá Miklubraut. Ljóst sé þó að vinna verður tillöguna frekar í samvinnu við skipulagsfulltrúa.
Heimild: Mbl.is
