Það er ekki í forgangi hjá Vegagerðinni að bæta fallvarnir undir Eyjafjöllum þrátt fyrir banaslys eftir grjóthrun í vor. Varaþingmaður sakar stofnunina um ranga forgangsröðun.
Ekki stendur til að ráðast í neinar fallvarnir við Holtsnúp undir Eyjafjöllum, þar sem banaslys varð í mars eftir að grjót hrundi úr fjallinu.
Þetta kemur fram í svari innviðaráðherra við fyrirspurn Ingveldar Önnu Sigurðardóttur, varaþingmanns Sjálfstæðisflokksins.
Kona lést þegar grjót hrundi á bíl sem hún ók á þjóðvegnum við Holtsnúp í Steinafjalli, hún klemmdist inni og var úrskurðuð látin á vettvangi. Ekki hefur verið ráðist í neinar framkvæmdir á slysstað síðan og það stendur ekki til.
Í svarinu segir að Vegagerðin forgangsraði fjármunum árlega í svokallaðar „minni öryggisaðgerðir“ og sem stendur séu aðgerðir við Holtsnúp, þar sem slysið varð, ekki á áætlun.
„Þetta er mjög upplýsandi um hvernig fjármunum er forgangsraðað,“ segir Ingveldur í samtali við fréttastofu. „Ég bjóst við að fólk myndi vakna af værum svefni,“ segir hún og rifjar upp að þetta hafi ekki verið í fyrsta sinn sem grjót hrynur á veginn á þessum slóðum. „Fyrir nokkrum árum keyrði móðir mín á stein. Sem betur fer komst hún vel frá því.“
Aðspurð segir hún svarið til marks um ranga forgangsröðun Vegagerðarinnar. Grjótvarnir séu tiltölulega einfaldar aðgerðir sem kosti lítið, sé litið til hugsanlegs tjóns.
Fimm grjótvarnir á landinu
Ingveldur spurði jafnframt hversu oft grjót hefði fallið á bíl á vegi.
Alls hefur það gerst 96 sinnum á síðustu 25 árum að snjór eða grjót hafi hrunið á bíl. Þar af hefur það sex sinnum valdið meiðslum á fólki, en önnur tilvik eru án meiðsla. Ingveldur spurði jafnframt um fjölda þeirra tilfella þar sem grjót hefur hrunið á veg, hvort sem það hrundi á bíl eða ekki.
Í svari ráðherra kemur fram að ekki hafi verið haldið nákvæmt bókhald utan um það. Til dæmis sé það ekki endilega skráð ef starfsmenn Vegagerðarinnar verða sjálfir varir við grjót á vegi og hreinsa jafnóðum.
Jafnan sé það þó skráð ef tilkynning berst og grjótið hefur áhrif á umferð. Skráð tilvik um grjót á vegum hafa verið á bilinu 30–60 á ári. Í svari ráðherra kemur fram að hann hafi farið þess á leit við Vegagerðina að hafin verði skipuleg skráning á grjóthruni á vegum.
Þó kemur fram í svarinu að 86 staðir séu á landinu þar sem hætta er talin á grjóthruni, en aðeins fimm grjótvarnir séu landið um kring.
Heimild: Ruv.is
