Valgeir Tómasson, formaður Hjálparsveitar skáta í Kópavogi (HSSK), segir áformað að flytja inn í nýjar höfuðstöðvar sveitarinnar í Tónahvarfi 8 í kringum páskana.
Framkvæmdir við höfuðstöðvarnar eru langt komnar og er nýbúið að malbika planið fyrir framan og aftan húsið sem er undir Vatnsendahæð. Sveitin er nú á Kársnesi en það húsnæði mun víkja fyrir fjölbýlishúsum eins og Morgunblaðið hefur sagt frá.
Valgeir segir lokafrágang fram undan í Tónahvarfinu. Leggja þurfi rafmagn, setja upp loftræstikerfi, ganga frá lofti og þessar háttar en málningarvinna sé langt komin.
Nánar má lesa um málið í Morgunblaðinu í dag, laugardag.
Heimild: Mbl.is
