Níu banaslys hafa orðið í mannvirkjagerð á Íslandi á undanförnum árum, þar af þrjú á þessu ári. Vinnuslys á Íslandi eru hlutfallslega langtum fleiri á Íslandi en í Noregi. Stefnt er að því að stofna sérstakan öryggisskóla.
Þrjú banaslys hafa orðið á byggingarstað á Íslandi á skömmum tíma. Karlmaður á fertugsaldri lést í Urriðaholti í lok ágúst og banaslys varð á byggingarstað í Árborg í vikunni. Í júní lést maður sem slasaðist í vinnuslysi á Akranesi.
Jóhanna Klara Stefánsdóttir er sviðsstjóri mannvirkjasviðs hjá Samtökum iðnaðarins: „Við höfum verið að bera okkur saman við lönd sem við viljum bera okkur saman við, Svíþjóð og Noreg, og við sjáum að það er staðreyndin að hér á landi er slysum heldur að fjölga.“
Samkvæmt tölum frá Samtökum iðnaðarins hefur slysum á byggingarstað fjölgað undanfarin ár. Í fyrra voru þau tæplega tólf á hverja þúsund starfandi í mannvirkjagerð. Á sama tíma hafa þau nánast staðið í stað í Noregi, í kringum sex. Þrír hafa látist við mannvirkjagerð á Íslandi í ár og hafa ekki verið fleiri undanfarin sex ár.
RÚV – Hjalti Haraldsson
Jóhanna segir mjög mismunandi hvernig fyrirtæki standi sig í öryggismálum: „Mörg fyrirtæki eru með mjög góða öryggismenningu og þekkja áhætturnar. Önnur fyrirtæki þurfa einfaldlega meiri hjálp.“
Mikið hefur verið byggt á Íslandi undanfarin ár og margir komið til landsins til starfa í byggingariðnaði, en hafa allir sem koma fullnægjandi reynslu? „Við sjáum að þar má gera betur. Við verðum að miðla okkar kröfum á mismunandi tungumálum.“ Nú er unnið að því að koma á laggirnar sérstökum öryggisskóla mannvirkjagerðar, sem vonir standa til að taki til starfa á nýju ári.
Heimild: Ruv.is
