Isavia hafnaði eina tilboðinu sem barst í viðbætur og breytingar á flugstöðinni á Akureyrarflugvelli. Stefnt er að nýju útboði í október.
Fyrirtækið Húsheild ehf. í Mývatnssveit bauð 910 milljónir króna í verkið. Sigrún Björk Jakobsdóttir, framkvæmdastjóri flugvallasviðs Isavia, segir tilboðið talsvert yfir kostnaðaráætlun og því hafi þess vegna verið hafnað.
„Við erum nú að yfirfara útboðsgögnin og munum bjóða verkið út aftur núna í byrjun október,“ segir Sigrún.
Um er að ræða 1.100 fermetra viðbyggingu við flugstöðina á Akureyri ásamt breytingum á núverandi flugstöð og nánasta umhverfi.
Fyrsta skóflustunga var tekin 5. júní og verkið boðið út mánuði síðar.
Heimild: Ruv.is
