Mikil íbúðauppbygging er á Hvammstanga um þessar mundir. Fimmtán íbúðir rísa á tveimur stöðum í bænum. Sveitarstjóri segir það mikinn fjölda í tólf hundruð manna sveitarfélagi. Um helmingur allra íbúa sveitarfélagsins býr á Hvammstanga.
Mikil uppbygging hefur verið á Hvammstanga síðustu ár eða allt frá árinu 2018, að sögn Unnar Valborgar Hilmarsdóttur, sveitarstjóra Húnaþings vestra. Fréttastofa sagði frá því í vetur að til stæði að hefja framkvæmdir á félagsheimili bæjarins.
RÚV / Kristófer Óli Birkisson
Nú má einnig sjá fimm íbúða raðhús taka á sig mynd ofarlega í bænum sem að sögn sveitarstjóra er í höndum verktaka frá Reykjavík. Neðar í bænum er svo kominn grunnur að tíu íbúða fjölbýlishúsi.
Af íbúðunum tíu eru tvær ætlaðar í almenna sölu og hinar átta til útleigu hjá leigufélaginu Brák.
Húsnæðisskortur hefur verið á Hvammstanga, eins og víðar, síðustu ár. Unnur segir það því mikið fagnaðarefni fyrir rúmlega 1200 manna sveitarfélag að 15 íbúðir bætist við. Rúmlega helmingur allra íbúa sveitarfélagsins búi á Hvammstanga.
RÚV / hunathing.is
„Hér eru síðan að minnsta kosti tvö einbýlishús í byggingu og búið að úthluta lóðir fyrir fleiri íbúðir. Þannig að hér er mjög mikið í gangi í húsnæðisuppbyggingu.“
Heimild: Ruv.is
