Nýjar reglur frá ESB munu hafa neikvæð áhrif á byggingarfyrirtæki sem sækja um framkvæmdalán.
Innleiðing nýrra fjármálareglna Evrópusambandsins, svokallaðra Capital Requirements Regulation III (CRR III), mun leiða til umtalsverðra breytinga á útlánaskilyrðum hér á landi.
Frumvarpið, sem efnahags og viðskiptanefnd Alþingis afgreiddi úr nefnd í byrjun mánaðar, kveður á um innleiðingu ESB-reglugerðar og á að efla viðnámsþrótt banka með því að gera eiginfjárkröfur áhættunæmari og betur í takt við raunverulega áhættu.
Breytingarnar eru ekki síður umfangsmiklar fyrir byggingaraðila og verktaka sem sækja um framkvæmdalán. Í CRR III er eins og áður segir lagt upp með að hægt verði að lækka áhættuvog lánveitinga til framkvæmda ef verktaki leggur fram verulegt eigið fé.
Samkvæmt drögum EBA ætti þetta eigið framlag að nema 35% af söluverðmæti en ekki aðeins 20% af byggingarkostnaði, eins og áður var.
Samkvæmt óformlegri könnun Samtaka fjármálafyrirtækja hjá bönkunum hefði ekkert byggingarverkefni sem farið hefur verið í á síðustu árum uppfyllt þetta 35% hlutfall.
Samkvæmt heimildum Viðskiptablaðsins gæti regluverkið aukið vexti á framkvæmdarlánum um allt að 100 punkta.
Jóhanna Klara Stefánsdóttir, sviðsstjóri mannvirkjasviðs Samtaka iðnaðarins, segir að samtökin hafi viðrað áhyggjur sínar í umsögnum um frumvarp um breytingu á lögum um fjármálafyrirtæki en þær leggist ofan á áhyggjurnar af stöðunni á húsnæðismarkaði. Um þessar mundir er ekki margt sem vinnur með nauðsynlegri uppbyggingu á íbúðarhúsnæði, að sögn Jóhönnu.
„Háir vextir, lengri sölutími og sífellt hærri kostnaður vegna skorts á lóðum og hækkun opinberra gjalda hafa nú þegar dregið úr uppbyggingu íbúða og þar með veltu í greininni. Á þessum tímapunkti er því afar óheppilegt að bæta ofan á þá þróun frekari íþyngjandi kröfum, sérstaklega ef tekið verður mið af tillögum Evrópsku bankaeftirlitsstofnunarinnar um 35% eiginfjárkröfu á lán til fasteignaverkefna. Slíkt væri enn einn steinninn í götu húsnæðisuppbyggingar,“ segir Jóhanna.
Hún segir SI hafa lagt ríka áherslu á að stjórnvöld fylgist náið með þróun mála í kjölfar þessarar innleiðingar og áhrifum af frumvarpinu. Efnahagsog viðskiptanefnd beindi því til ráðherra meðal annars að fylgjast með áhrifum af samþykkt frumvarpsins. Nefndin telur það sérstaklega brýnt að meta áhrif innleiðingarinnar á fyrstu kaupendur og uppbyggingu húsnæðis og eftir atvikum kanna hvort þau gefi tilefni til að skoða önnur úrræði af hálfu stjórnvalda til að koma til móts við þennan hóp og bregðast við aðstæðum á húsnæðismarkaði.
„Við tökum einnig undir þær áhyggjur sem komu fram hjá seðlabankastjóra í kjölfar yfirlýsingar fjármálastöðugleikanefndar Seðlabankans í síðustu viku, þar sem vikið var að byggingariðnaðinum og þeim áhættuþáttum sem felast í því ef hægist á sölu á fasteignamarkaði og verktakar sitji eftir með óseldar íbúðir á háum vöxtum. Þetta eru raunveruleg og viðkvæm viðfangsefni sem nauðsynlegt er að bregðast við ef ekki á illa að fara,“ segir Jóhanna.
Heimild: VB.is
