Helgi S. Gunnarsson, byggingarverkfræðingur og fyrrverandi forstjóri Heima, segir miklar tekjur borgarinnar af þéttingarverkefnum ekki hafa skilað sér í betri innviðum. Borgin innheimti hærri gjöld á hverja íbúð en áður en aukinn þéttleiki byggðarinnar auki tekjurnar enn meira á hvern hektara.
Tilefnið er viðtal í Morgunblaðinu á föstudaginn við Þorvald Gissurarson, forstjóra og eiganda ÞG Verks, sem taldi aukna gjaldtöku á byggingu íbúða í borginni ekki hafa skilað betri innviðum.
„Þegar fólk kaupir nýja íbúð greiðir það oft yfir 20% af íbúðarverðinu í einhvers konar lóðargjöld og tengdan kostnað en fyrir tíu árum greiddi það kannski 10-15% af kaupverðinu í slík gjöld,“ sagði Þorvaldur meðal annars í viðtalinu.
Helgi tekur undir þetta og bendir á að raunar hafi tekjur borgarinnar aukist enn meira. Með því vísar hann til þess að aukinn þéttleiki – fleiri íbúðir á hvern hektara – skili borginni meiri tekjum á hvern hektara í formi gjalda og útsvars.
Raunar aukist enn meira
„Með auknum þéttleika byggðar og hærra nýtingarhlutfalli, og þá sérstaklega á þéttingarreitum, hafa tekjur borgarinnar sem Þorvaldur telur upp í raun hækkað enn meira. Með auknum þéttleika eru enda fleiri íbúðir á hvern hektara, sem skapar mun meiri tekjur fyrir sveitarfélagið í formi gjalda, skatta og útsvars. Þarna er bein tenging,“ segir Helgi.
Nánari umfjöllun er að finna í Morgunblaðinu sem kom út í fyrradag, laugardaginn 8. febrúar.
Heimild: Mbl.is
