39 ára bandarískur karlmaður lést samstundis þegar hann datt ofan í stóran tank með 1.100 gráðu heitu bráðnu járni í málmsteypu Caterpillar í Illonois í Bandaríkjunum í júní.
Þetta kemur fram í fréttatilkynningu frá bandaríska vinnueftirlitinu, Occupational Safety and Health Administration.
Maðurinn var sérfræðingur í verksmiðjunni og var að taka sýni af bráðnuðu járni þegar hann datt ofan í tankinn. Maðurinn hafði aðeins starfað í níu daga í verksmiðjunni.
Rannsókn vinnueftirlitsins leiddi í ljós að ef öryggisgrindur hefðu verið til staðar hefði verið hægt að koma í veg fyrir slysið. Rannsóknin leiddi einnig í ljós að málmsteypan lét starfsfólk oft vinna við hættulegar aðstæður þar sem það átti á hættu að detta ofan í stóra tanka með bráðnuðu járni.
Það er skylda samkvæmt lögum að fyrirtæki setji upp öryggisgrindur eða noti lok þegar hætta er á að starfsfólk detti ofan í hættuleg efni.
Niðurstaða vinnueftirlitsins var að Caterpillar hafi ekki staðið við lögbundnar skyldur sínar um að tryggja öryggi starfsfólk. Fyrirtækinu var gert að greiða 145.000 dollar í sekt.
Heimild: Dv.is
