Byggingargeirinn hefur sjaldan séð eins langt fram í tímann varðandi verkefnastöðu og nú.
Þetta sagði Sigurður Brynjar Pálsson, forstjóri Byko, í sjónvarpsþættinum Markaðurinn sem verður frumsýndur klukkan sjö í kvöld á Hringbraut.
Hann sagði ástæðuna fjölþætta og nefndi meðal annars umsvif við byggingu íbúða og að verkefni sem ríkisstjórnin lagði upp með til að takast á við niðursveiflu í efnahagslífinu sem rekja má til Covid-19 hafi nú lokið útboðs- og hönnunarferli.
Þar sé meðal annars um að ræða samgöngumannvirki og stærri byggingar.
Sigurður sagði að það væri byggt of lítið af íbúðarhúsnæði í Reykjavík.
Það leiði til ójafnsvægis á markaðnum þar sem eftirspurn og framboði fari ekki saman. Akranes, Hveragerði, Selfoss og Suðurnes njóti góðs af því.
Þar hafi verið lóðir til að byggja á og mikil uppbygging. „Fólk flytur frá borginni,“ sagði hann og nefndi að það væri ekkert tiltökumál að keyra um hálftíma frá vinnu.
Auk þess væru margir vanir fjarvinnu.
Heimild: Frettabladid.is
