Um tíu ár eru síðan innsiglingarvitinn í turni Sjómannaskólans við Háteigsveg hvarf nánast úr augsýn sjómanna, eftir að ýmsar turnbyggingar voru reistar við Höfðatorg.
Nú horfir til breytinga, en í bígerð er nýr viti sem staðsettur verður á landfyllingu við Sæbraut, til að tryggja örugga merkingu siglingaleiðarinnar í Gömlu höfninni og í Sundahöfn.
„Við stefnum á að smíða vitann nú í vetur,“ segir Gísli Gíslason, hafnarstjóri Faxaflóahafna í samtali við mbl.is. „Það er svolítil kúnst að fá ljósin í þetta og svo þarf að ræða fráganginn á landfyllingunni við borgina.“
Fá áningarstað í kaupauka
Komnar eru fram nokkrar hugmyndir um það hvernig fyrirhugaður viti eigi að líta út en ekki er búið að taka endanlega ákvörðun um það hvaða útlit verður fyrir valinu. Sú ákvörðun verður þó tekin fljótlega, að sögn Ernu Kristjánsdóttur, markaðs- og gæðastjóra Faxaflóahafna.
Á tölvuteikningu Yrkis arkitekta hér að ofan hefur vitinn sama útlit og þeir sem fyrir eru á Norðurgarði og Ingólfsgarði við Reykjavíkurhöfn, en þeir eru hátt í aldargamlir.
Reykjavíkurborg gerir ráð fyrir að svæðið við vitann geti nýst þeim sem leið eiga um svæðið, hvort sem um sé að ræða útivistarfólk eða ferðamenn.
„Það er það sem borgin er að spá í, við erum einungis að hugsa um að koma upp vitanum,“ segir Gísli. „Borgin fær áningarstaðinn í kaupauka, en þetta verður væntanlega samstarfsverkefni okkar.“
Vitar ávallt nauðsynlegir
Frá árinu 1945 hafði vitinn í turni Sjómannaskólans þjónað hlutverki sínu sem innsiglingarviti í Reykjavíkurhöfn en eins og áður sagði hefur hann ekki getað sinnt því undanfarin ár, vegna nýbygginga í Borgartúni.
„Hann er í raun aðeins hálfur, það er ljósgeislinn nær ekki allan hringinn út á sjó,“ segir Gísli.
Spurður hvort vitar séu enn í dag mikilvægt öryggistæki, á tíma alls kyns staðsetningartækja og -tóla, segir Gísli að svo sé.
„Auðvitað eru menn með mikið fleiri tæki en þetta er ákveðið prinsipp, að til staðar séu ljósleiðsögutæki sem vísa veginn.“
Heimild: Mbl.iskj
