Dráttur verður á að vinna við breytingar á flugskýlum á Keflavíkurflugvelli vegna komu bandaríska hersins hefjist, en ekki er búið að samþykkja frumvarp um fjárframlög til varnarmála á Bandaríkjaþingi. Þetta kemur fram í svari Utanríkisráðuneytisins við fyrirspurn Suðurnes.net.
Nýtt fjárhagsár Bandaríska ríkisins hófst þann 1. október síðastliðinn og var gert ráð fyrir að verkefni á vegum bandaríska hersins á Keflavíkurflugvelli hæfust formlega eftir þann dag, einhver dráttur mun þó verða á því.
Varnarmálaráðuneyti Bandaríkjanna gerir ráð fyrir að kostnaður við breytingar á flugskýlum á Keflavíkurflugvelli, vegna komu P-8 flugvéla til landsins, muni nema tæplega þremur milljörðum króna. Þar af er gert er ráð fyrir að um 650 milljónir króna fari í að koma upp nauðsynlegri hreinsiaðstöðu og um 200 milljónir í skipulags- og hönnunarvinnu.
Þá kemur fram í svari ráðuneytisins að viðræður á milli aðila séu í undirbúningi og að línur verði lagðar að verkáætlun og fyrirkomulagi varðandi framkvæmdina í þeim viðræðum.
Heimild: Suðurnes.net
